假設你考咗網約車筆試,準備申請網約車車輛許可證。運輸署批許可證嗰陣,架車要有包網約車用途嘅第三者保險。你第一個問題多數係:使唔使另外買張商業車保險?
唔使。以我哋合作嘅保險公司截至 2026 年 11 月嘅安排,做法係喺你現有嘅私家車保單(Motor Insurance)加一張「網約車延伸保障」批單。加咗批單,保險公司就會發「網約車保險證書」。
批單(endorsement)即係保險公司喺原保單上面加嘅修改,所以一定要有張私家車保單先加得,唔可以淨係買批單。重點有六樣:
要先攞到運輸署批出嘅網約車車輛許可證名額,保險公司先會加,唔係有車保就加得
唔使買新單,批單加喺你現有張車保上面
全保跟全保,三保跟三保
網約車行程出事 claim,會影響成張單嘅 NCD;excess 另計
張車保要保到許可證最後一日
延伸保障唔適用於港車北上保險
全保即係綜合保險,連你自己架車都保;三保即係第三者保險,只保你撞傷人或者整壞人哋嘢。細節以你張保單嘅批單為準。
加咗批單,邊啲情況有保?
原保單保咩,網約車行程就保咩。原單唔保嘅嘢、賠償上限,網約車行程一樣照跟。
情況 | 有冇保障 |
|---|---|
平日私家用 | 照保,同加批單之前一樣 |
車主自己揸,經持牌平台喺香港接單 | 有(合資格行程,跟原單條款同限額) |
記名司機(named driver)揸車做私家用 | 照保 |
記名司機用你架車接網約車單 | 延伸保障唔適用(唔符合法例) |
喺未持牌嘅平台接單 | 延伸保障唔適用(唔符合法例) |
港車北上汽車保險 | 延伸保障唔適用 |
表入面係大方向,實際以批單同保單條款為準。
記名司機即係保單上面列明可以揸呢架車嘅人。《道路交通條例》第 55E 條訂明,只有登記車主本人可以揸網約車車輛提供網約車服務;法例亦要求經持牌平台接單。
所以如果太太係記名司機,平日揸架車照保,但佢唔可以用架車接單。記名司機幫你揸車接單,或者喺冇牌嘅平台接單,都唔符合法例要求。延伸保障只適用於香港境內符合法例嘅網約車服務。
出事 claim,NCD 同 excess 點計?
NCD(無索償折扣)即係保單期內冇 claim,續保有折扣;有 claim,折扣會減。網約車延伸保障用嘅係原單嘅 NCD。
所以接單途中出事 claim,影響嘅係成張單嘅 NCD,平日私家用嗰部分都一齊受影響。
Excess(自負額)即係每次 claim 你自己要先畀嘅部分,保險公司賠餘數。網約車延伸保障有兩項自己嘅 excess:一般 excess,同第三者財物損毀 excess(例如撞花人哋架車)。
原保單其他 excess 都可能同時適用,即係同一單 claim 你可能要畀多過一筆。加咗批單之後,翻開批單或者保單文件,睇清楚網約車嗰兩項 excess 寫幾多。
張車保要保到幾時?
保險公司嘅指引寫明:網約車保險證書要覆蓋車輛許可證成個有效期。即係許可證去到幾時,你張車保同批單就要保到幾時。
假設你張車保 2027 年 3 月 31 號到期,許可證就去到 2027 年 8 月 31 號。咁就要先將車保延長 5 個月到 8 月 31 號,再加批單。
記住兩個數就得:
原保單唔夠長,可以先延長,最長延 6 個月。
之後加嘅批單,最長可以保 16 個月,即係首張許可證最長嘅年期。
許可證最遲只可以去到你架車嘅行車證(即係車輛牌照)到期嗰日(《道路交通(網約車服務)規例》),所以計日子要睇埋張行車證。
延伸保障幾錢,要睇過你張原保單先報到,所以呢度唔列價錢。WhatsApp 我哋,發埋保單 schedule 同行車證到期日,我哋幫你計日子同報價。
三份文件,唔好搞亂
網約車有三份文件,名好似,用途唔同:
文件 | 邊個發 | 用嚟做咩 |
|---|---|---|
網約車車輛許可證 | 運輸署 | 准你架私家車做網約車 |
網約車保險證書 | 保險公司 | 證明車保包網約車用途 |
網約車車輛證明書 | 運輸署 | 提供服務期間喺車上展示 |
次序係:獲批許可證名額之後,準備好保險證書同其他文件,向運輸署申領車輛證明書,費用 HK$245。
許可證續期要喺到期前 4 個月至 1 個月內申請,同樣要有網約車用途嘅有效第三者保險。車保續保嗰陣,記得確認延伸保障仲喺張單度。
未有車保,或者張單喺其他保險公司?
新客要先買張私家車保單,照保險公司平時嘅承保條件,例如有保險公司要求記名司機年滿 25 歲。出咗單,先可以加網約車延伸保障。
網約車司機最低 21 歲,但個別保險公司嘅私家車承保年齡會高過呢個,年輕車主要問清楚先。
張車保喺其他保險公司,就要問佢哋有冇網約車延伸保障,同埋條件係咪一樣。
點解私家車保單唔夠用?
法例規定,運輸署批許可證之前,架車要有包網約車用途嘅第三者保險。次序係:先獲批許可證名額,再加延伸保障,之後向運輸署交保險證書同其他文件。
我哋睇過兩份私家車保單條款,都寫明架車用於 hire or reward(出租或取酬),保單就唔運作。網約車延伸保障就係為網約車用途加落張單嘅保障。
而家申請到未?
截至 2026 年 11 月 18 日,運輸署網約車網頁寫住預計 2026 年第四季邀請車輛許可證申請,詳情稍後公布。許可證上限係 10,000 個(限額公告)。
未開放申請,即係仲未有人攞到名額,所以而家仲未加得網約車保障。
不過都值得預早計保單日子,因為法例要求運輸署批許可證嗰陣,保險已經生效。司機、車輛同平台要求,見網約車新制:私家車車主想接單,而家實際要做咩?
今日可以做咩?
記住:攞到運輸署許可證名額之後,先可以加網約車保障
翻開保單 schedule,睇清楚係全保定三保,同埋幾時到期
睇行車證到期日,對吓同車保差幾遠
將保單 schedule 同行車證到期日 WhatsApp 畀我哋,攞延伸保障報價
免責聲明:本文僅供參考,不構成保險建議。實際保障範圍以保單條款為準。
如需專業保險建議,請聯絡持牌保險代理。
Disclaimer: This article is for reference only and does not constitute insurance advice.
Actual coverage is subject to policy terms and conditions.
文中日期例子為假設,僅作說明用途;法律問題請諮詢律師。
相關文章
常見問題
網約車保險要唔要另外買一張單?
加咗網約車延伸保障,NCD 點計?
網約車保險證書要保幾耐?
記名司機可唔可以用我架車接網約車單?
網約車延伸保障適唔適用於港車北上?
準備申請網約車許可證?WhatsApp 我哋報價
要先攞到運輸署批出嘅許可證名額,先可以加網約車保障。想預早準備,將你張私家車保單 schedule(保單頭幾頁)同行車證到期日發畀我哋,我哋報價,順手計埋張車保要唔要先延長。WhatsApp 或致電 2633 6813,電郵 cs@looperin.com。






