開舖做生意，風險係日日埋身嘅：客人喺舖頭跌親、貨架倒冧、火災水浸毀晒存貨、收銀有現金、賣出去嘅貨出事⋯⋯ 零售店舖嘅保險，重點唔係買得多，而係買得啱、唔甩漏。呢度幫你理清要保咩。

1. 僱員補償保險（EC）—— 法定

有請售貨員、收銀、倉務就必須買 EC。根據《僱員補償條例》（香港法例第 282 章），冇有效 EC 保險屬刑事罪行，最高罰款 HKD 100,000 及監禁兩年。

2. 公眾責任（PL）—— 客人喺舖頭出事

客人滑倒、被貨架或陳列品整親、財物喺舖內損失，你要負法律責任。零售人流高，PL 係必備；商場舖位租約亦常指定保額。

3. 財產 / 火險 + 存貨

裝修、陳列櫃、設備同存貨都係真金白銀。火災、水浸、爆竊一鋪清袋，財產保險（連存貨）幫你重置。可加營業中斷補返停業收入。

4. 金錢保險（Money）

收銀現金、營業款項喺店內或入銀行途中嘅損失（搶劫、盜竊），由金錢保險承擔。

5. 產品責任（Product Liability）

你賣嘅貨令客人受傷或生病，就算只係轉售，都可能要負責。產品責任保呢類索償，賣食品、電器、嬰兒用品嘅尤其要留意。

仲可以考慮

• 店面玻璃（Glass）： 大型玻璃門面或櫥窗破損。

• 員工忠誠（Fidelity）： 員工盜竊或挪用款項。

點解零售最易漏？

因為「睇得到」嘅風險（火、盜）容易記得買，但「責任型」風險（客人跌親、賣出去嘅貨出事）容易被忽略，偏偏呢啲先係最大額嘅索償。