香港搞活動，最怕咩？

場地租金、搭建費、宣傳費、表演者費用⋯⋯一個中型活動嘅前期投入隨時幾十萬。然後天文台掛八號風球，活動被迫取消。冇保險嘅話，呢幾十萬就咁冇咗。

香港嘅颱風季由 6 月持續到 11 月，每年都有熱帶氣旋影響香港。如果你喺呢段期間搞活動，活動取消保險（Event Cancellation Insurance）唔係可有可無，係必須品。

活動取消保險保啲咩？

活動取消保險保障因為預計唔到嘅原因，導致活動被迫取消、延期或者中斷而造成嘅經濟損失。常見嘅受保原因包括：

惡劣天氣：颱風信號、暴雨警告、極端天氣導致無法舉辦活動。戶外活動嘅惡劣天氣要另加延伸先保到，下面會詳細講。

場地問題：場地突然無法使用（例如火災、水浸、結構問題）。

主要參與者無法出席：主講嘉賓、表演者因意外或疾病無法到場。

公共交通中斷：因天氣或其他原因導致公共交通停運，參加者無法到場。

颱風取消，其實保喺邊一格？

呢一點好多主辦方買錯。戶外活動或者帳篷活動因為惡劣天氣而取消，一般唔喺標準取消保障之內，要另外加購惡劣天氣延伸（Inclement Weather）先保得到；室內活動因為天災而無法舉行，則多數落喺標準取消保障。所以簽單之前一定要問一句：我張單有冇惡劣天氣延伸？

另一條容易中伏嘅規則係「已完成 60%」：如果活動或者演出已經正常進行咗預定時間嘅 60%，取消同主要參與者缺席嘅保障就會終止。即係話八號風球喺活動尾聲先掛，未必賠得到。

幾時要買？

投保有明確嘅開單期限，唔係活動前一日仲買到。一般最少要喺活動前 5 日開單；如果要加惡劣天氣延伸，最少要喺活動前 10 日開單。最早可以喺活動前一年投保。

而且保單通常唔保已經存在嘅風險。投保時颱風已經形成，保險公司可以拒絕承保該颱風造成嘅取消。所以唔好等到天文台發出預警先急住買，嗰時多數已經買唔到。

保費點計？

活動取消保險冇公開費率表，保費逐單核保。影響報價嘅主要因素：

要投保嘅預算金額：即係你希望攞得返嘅損失有幾多，包括退唔到嘅前期開支同列明嘅利潤。呢類保單通常對可投保預算設有上限。

室內定戶外：戶外活動風險高好多，通常要另外填戶外活動問卷。

日期同季節：颱風季同雨季嘅戶外活動核保會嚴啲。

要唔要惡劣天氣延伸：加咗呢個部分，投保門檻同開單期限都唔同。

活動性質同往績：演唱會、體育賽事、展覽、婚禮嘅風險輪廓唔同；同一個活動過往有冇取消紀錄亦會睇。

後備方案：有冇後備場地、後備日期、疏散同人流安排。

申報預算亦要老實。如果申報嘅預算低過應該投保嘅金額，差額超出保單訂明嘅範圍，保險公司有權按比例減賠。想慳保費而報細個預算，出事嗰陣賠款會一齊縮水。

颱風季前籌備活動，可以對住活動籌備指南逐項檢查場地、供應商同保險文件。