開箱見到貨爛咗，第一時間做啲咩？

好多客人以為貨物運輸出咗事，第一件事係打電話去保險公司 report。其實唔係。第一件事係：唔好簽個 clean receipt 畀運輸公司。一簽落去，你就等於確認咗貨物完好無損收到，之後想追返個賠償會麻煩好多。

無論你運嘅係家俬、藝術品、機器定係普通貨物，marine cargo insurance 嘅 claim 流程都係由開箱嗰一刻開始計。第一時間做啱幾樣嘢，可以幫你慳返幾萬蚊唔等。

開箱嗰陣要做嘅三件事

第一，即刻影相同影片。影外箱、影內箱、影損壞部分、影運輸 label。越多角度越好，timestamp 越清楚越好。如果有水浸、有破損、有凹陷，每一個位都要影。

第二，要求司機喺 delivery note 上面寫低損壞。簡單寫一句「received with damage, subject to inspection」然後雙方簽名。呢一步好重要，係你之後證明「貨一到嚟已經爛咗」嘅直接證據。

第三，保留晒所有包裝物料。唔好執走，唔好丟。保險公司派嚟嘅 surveyor 會睇吓個包裝係點，判斷係唔係運輸過程中整爛。

通知保險代理，唔係保險公司

做完以上三件事，24 小時內 WhatsApp 你嘅保險代理。唔好喺未對清楚事實之前，自己寫長 email 向保險公司解釋成因。通知保險公司可以由代理即日幫你做，一樣趕得切保單時限。自己寫 email，一句講錯嘢，或者漏咗啲關鍵字眼，之後要拗返個 claim 會好痛苦。

保險代理會幫你一次過搞掂：開 claim file、通知保險公司、跟進保險公司委派嘅公證行（surveyor）、準備文件。你只需要提供 Bill of Lading、Commercial Invoice、Packing List、Policy Schedule（代理會幫你搵返）、加埋你影嘅相。

Surveyor 上門嗰日，最好有代理陪

Surveyor 係保險公司委派嘅獨立公證行，負責核實損失成因同金額。如果受保人冇準備好文件同報價，report 好容易漏記項目，最後評估出嚟嘅金額可能低過實際損失。

所以 survey 當日最好有保險代理陪同，確保每一項損壞都詳細記錄入 report，包括重置成本、維修報價，同埋保單有冇加保嘅額外費用。呢一步做得好唔好，直接決定你最後收幾多錢。

Negotiation 先係真正分勝負

Surveyor report 出咗之後，保險公司會 offer 一個數。呢個通常唔係最終數，係第一個出價。常見可以爭嘅位包括 depreciation（舊機扣錢）、salvage value（爛貨殘值歸邊個）、excess（自負額），同埋保單寫明嘅投保價值（insured value）點計。

呢一步冇代理幫手基本上冇得拗。保險代理日日同 insurer 傾 claim，知道咩位可以爭、咩位冇得爭。文件齊、企得硬嘅 case，同一單損失最終攞到嘅賠償可以差好遠。